Ang Mahinang Sotanghon

Ang Mahinang Sotanghon

ni Bujay

Umiinog ang sulyáw ng buhay

sa kalawakan ng microwave na inilawan

at sinaliwan ng sumisikdu-sikdong kumpas.

Sa kumukulong tubig ng hamon sa loob,

ang sotanghon—

 may mga bumabalu-baluktot,

may mga nangangalambre,

may mga naninikil,

may mga ‘di pasisiil

at mga nagpapatangay

sa agos ng karamihan;

lahat nakikipagbalyahang maunang makapagsuot

ng timpladong sangkap na nanonoot

naman sa lahat ng hibla—

sa tamang panahon,

tuloy nanlalambot sila’t hindi makalaban

sa estrangherong sa kanila ay lalamon.