Usad Kolehiyala

ni Bujay

Sinong binusog ng pagod 

ang siyang ginutom ng tulog?

Sinong ginising ng tala

ang siyang pinahimbing ng umaga?

Sinong niyakap ng luha

ang siyang itinulak ng ligaya?

Ako.

Binilisan ko kasi

kasabay ng nagmamadaling araw

lisanin ang buhay ko, diyan

kapalit ng kinabukasang malabo, dito.

Nang papunta'y ang mga magulang ko,

ang mismong humabol

sa bus nang may 

pagpipigil. 

Alam kong ayaw nila akong pakawalan

nang nag-iisa. Pero kailangan.

Hindi nga nakabili ang Nanay ng inumin

paandar na kasi ang sasakyan

kaya hinayaan ko nalang ang pagkauhaw

at niyakap nalang sila nang mahigpit saka hinalikan,

at biglang tinalikuran

nang 'di ko makita

bagyong nagbabadya

sa gilid ng kanilang mga mata

"Asikasom ditan. (Mag-ingat ka diyan.)

Anggano ag mo la naperpek. (Kahit 'di mo na ma-perfect.)"