Buhbye

Bujay

Kung ang paglisan ay maituturing na kasawian

puwes sa akin ay magsisilbi itong kasiyahan 

Kung ang paglimot ay maituturing na kalungkutan

puwes magpapakasaya ako 

Dahil sa wakas naramdaman ko ulit ang aking pagkatao 

Dahil sa mga panahong kasama kita nabulag ako 

Namanhid nang unti-unti ang katawang lupa ko 

At nakalimutan ko na ako'y may damdamin rin pala 

Nakalimutan ko na pwede rin pala akong malungkot 

At ang kaligayahang ipinadama mo sa akin ay maaari rin palang mabaon sa limot 

At sana alam mo rin na punong puno ng latay ang aking katawan 

Dulot ng iyong pagdating sa aking buhay

Oo napakalaki ng pinsalang sa akin ay dinala mo 

Mga pinsalang ginusto ko 

Mga pinsalang ninais ko 

Mga pinsalang minahal ko 

Oo tama ka, minahal ko ang mga pinsalang dulot mo 

Kaya ngayong wala ka na, nangako ako sa aking sarili 

Na mabibilang lamang ng mga daliri 

Ang mga luhang dadaloy mula sa aking mga mata 

Oo sisiguraduhin ko na iilan lamang doon ang para sa iyo 

Dahil tulad ng sabi ko, magpapakasaya na ako 

At ang paglisan mo ay ituturing kong parang isang regalo

Salamat, kaibigan.