AKALINGWAN

ni Bujay

Sika so nanbilay ed siak

Tan angiter a linawak

Diad aro siyak et pinabaleg

Inter mo'y amin a nepeg

No siak et maermen

Aka ngiriyet mo ak ya arapen

Unpiyan ungulis met ed bibil ko

Liket a manpunas a gunigon ko

No siak et napatapba

Agko anta no aki't uneelek ka

Maliket ka labat manaya 

Ta diyad sarili'k unaalagey ak la

No kulkulen da ak 

Sika so unaan a mangiagel ed siak

Diad irap tan gayaga

Sika tan duwa so mankaiba

Balet anto'y agawa, Inang

Akin et ag mo ak la nakabatan

Amin a agawa et ag mo la nanunutan

Pati ngaran mo et alingwanan

Unman siren so untatakken

Singa utek a pipikeweten

Anggad nunot et natilak

Tan agala naanap

Balet anggano unya ka la, Inang

Ag ta kan balot taynanan

Iter ko'y amin a panangaro

Ta aman so neped a parad sikayo.

[Pangasinan Poem]